Brjálað að gera í myndainnsetningu ;)

...enda ofhitnar myndavélin þegar við skreppum vestur á firði...

Hér kemur sem sagt stappfullt albúm frá fyrstu vesturferð sumarsins:

Ferðalög og flakk...

Það hefur aldeilis margt á daga okkar drifið síðan síðast enda fjölskyldan búin að vera í fríi saman. Við höfum verið dugleg að flakka og erum tiltölulega nýkomin úr tveggja vikna vist í Dýrafirðinum. Við vorum búin að skjótast þangað fyrr í sumar í smá skreppu...til fylgjast með framkvæmdunum í Gröf. Það var því ansi spennandi að koma aftur og sjá hvernig þessu miðaði. Við erum ansi lukkuleg með nýbygginguna...nú "eigum" við okkar eigið herbergi á þessum dásemdarstað og ekki laust við að maður fái víðáttubrjálæði við þessa stækkun :)



Við tókum með okkur fellihýsið í ferðalagið og dóluðum okkur á leiðinnin vestur, með Mundu ömmu og Hössa afa. Stoppuðum á Tálknafirði á flotta tjaldsvæðinu þar, mælum hiklaust með því. Þar gátum við nú skoðað ýmislegt og gátum nú loks merkt við að hafa séð Rauðasand...var búin að vera lengi á listanum ;) Sá staður stóð alveg undir væntingum og verður pottþétt heimsóttur aftur.

Eftir tveggja nátta stopp á Tálknafirði héldum við svo í fjörðinn okkar og fylgdumst með smiðunum klára sitt verk, sváfum bara í fellihýsinu á meðan en gátum svo loks flutt inn í svítuna. Fyrir verslunarmannahelgina byrjuðu svo ættingjar og góðvinir fjölskyldunnar að þyrpast að og saman áttum við frábæra helgi. Elvar Orri var búinn að bíða spenntur eftir þessari helgi og það fyrsta sem hann sagði þegar hann vaknaði á laugardagsmorguninn var "Gleðilega verslunarmannahelgi!"...og hann naut sín sko í botn, lék sér við krakkana og saman voru þau öll eins og villibörn sem hurfu inn í skóginn og sáust bara til að sækja sér fæðu endrum og eins.

Á meðan dundaði sá yngri sér vel, var eins og kóngur í ríki sínu þar sem hann dubbaðist á milli sandkassans og rólunnar...stundum með smá viðkomu hjá bílunum eða fjórhjólunum, enda þurfti stundum að skella sér á bak við stýrið og brumma smá. Hann eignaðist líka góða vinkonu þessa helgina, Mandý vinkona Halldóru frænku heillaði hann upp úr skónum og sáust þau leiðast um svæðið. Mandý er að vísu aðeins eldri en Haukur Máni svo óvíst er hvort um frekari samband verði að ræða en við dáðumst að því hvað hún nennti að stjana við prinsinn og ýta honum í rólunni...en Haukur Máni getur setið tímunum saman í rólu ef einhver nennir að ýta ;)

Á þessu litla árlega ættarmóti okkar hefur tíðkast börnin fái að koma upp og syngi eða dansi á kvöldvöku og þetta árið ákvað Elvar Orri að syngja lagið Wavin´Flag og gerði það með prýði...hann var alveg á mörkunum með að þora en ákvað að ögra sjálfum sér og stökkva upp á "svið" og voru foreldrarnir mikið stoltir af sínum manni.

Þetta er nú bara brotabrot af öllu því sem dundað var í þessari ferð og eftir að í bæinn kom þurfti pabbakallinn að fara að vinna. Mútta og snáðarnir eru því búin að hafa það rólegt heima við...ja rólegt og ekki rólegt...synirnir eru nú svo sem ekki þekktir fyrir neina lognmollu ;) Einnig var þvottafjallið dálaglegt eftir þessa ferð og það tekur nú tíma að vinna á því...Nú og svo er verið að plana að skella sér bara aftur vestur á næstu dögum, enda er bara frábært að vera í dalnum okkar og þar viljum við eyða sem mestum tíma, frábært að fylla aðeins á tankana fyrir haustið.

Skellum myndum inn fljótlega...það vantar sko ekki að það hafi verið teknar myndir :)

Bestu kveðjur frá Sköftunum

Og enn sturtast myndirnar inn...

...ágætt að fá slæmt veður inn á milli, gott fyrir afköstin ;) Nú er hægt að smella beint á myndirnar til að opna albúmið...haldið að þetta sé tæknivætt hjá manni :)

Nýjar myndir...

Myndir frá 17. júní



Myndir frá 7 ára afmæli Elvars Orra

Maí albúmið loks komið inn :)

Tengillinn á myndasíðuna er hér aðeins neðar...

Það sem af er sumri...

...hefur verið mikið að gera hjá Sköftunum. Skagamótið og afmælisundirbúningur lögðu meirihlutann af júní undir sig og hefur því verið mikið stuð á okkur síðustu vikur.

Elvar Orri stóð sig vel á Skagamótinu og foreldrunum fannst virkilega gaman að fylgjast með fótboltaguttanum sínum. Hann vann líka sína persónulegu sigra þessa helgi; að sofa í skólanum með strákunum...án þess að sjúga puttann fyrir svefninn ;) Það hafði nefnilega valdið honum þó nokkrum áhyggjum að gert yrði grín að honum fyrir að sjúga puttann. Það var því stoltur strákur sem tilkynnti foreldrunum að hann hefði ekkert þurft að sjúga puttann!

Svo varð okkar maður sjö ára, þann 21. júní og við héldum auðvitað upp á það með pompi og prakt. Fyrst var haldið bekkjarafmæli og síðan voru vinum og fjölskyldumeðlimum skipt upp í tvö holl og haldin sitt hvor veislan :) Það hefur því verið mikið um bakstur og afmælispælingar hjá okkur. Elvar Orri var líka með ákveðnar skoðanir á því hvernig afmæliskakan ætti að vera; hann langaði í Joe Boxer köku...sem sagt broskalla-köku. Hún tókst nú bara ljómandi vel og vakti lukku hjá pilti. Foreldrarnir fengu svo aðeins að ráða því hvernig næstu kökur yrðu...nema þegar kom að því að baka kökuna fyrir síðustu veisluna, þá var hann harðákveðinn í því að hann vildi fá mynd af sér...hann hafði séð þetta í einhverri veislunni og fannst þetta afskaplega sniðugt :)

Foreldrunum finnst voða gaman að undirbúa og halda afmælin fyrir ungana sína en eftir þessar þrjár veislur í júní finnst þeim bara ágætt að næsta barnaafmæli sé ekki fyrr en í október ;)

Haukur Máni hefur nú verið nokkuð rólegur yfir þessu stússi...hefur þó reyndar tekið fullan þátt í afmælisfjörinu en hann á það til að vírast allverulega upp þegar mikið er af krökkum í kringum hann. Hann fær líka töluverða athygli frá krökkunum og stundum jaðrar það við áreiti...hann er bara svo ómótstæðilegur ;)...en þetta getur verið of mikið fyrir litlu jarðýtuna okkar, sem bregst þá því miður við með því að klípa og slá. Hann kann nú bara langbest við sig í rólegheitunum heimavið, það var t.d. ósjaldan sem heyrðist í honum "heim" á skagamótinu...var ekkert að nenna þessum þvælingi :) Nú er bara spurning hvernig hann tekur því þegar við bregðum undir okkur ferðalagafætinum...

Haukur Máni hefur sýnt miklar framfarir í málinu undanfarið, er farin að setja saman þriggja orða setningar og er mikið að þreifa sig áfram. Margt af því sem hann segir er alger "Hauk-íska"...en foreldrarnir skilja nú sinn mann.

Elvar Orri og mútta eru saman í sumarfríi þessa dagana og bíða spennt eftir því að pabbi og Haukur Máni fari í frí því þá ætlum við í paradísina okkar: Dýrafjörðinn! Elvar Orri er orðinn óþreyjufullur að komast þangað...sagði meira að segja við foreldrana að hann myndi bara fara með ömmu og afa ef foreldrarnir myndu ekki drífa sig af stað ;) En við stefnum nú á að fara í byrjun júlí, þá er pabbinn kominn í frí...svo Elvar Orri getur vonandi beðið rólegur þangað til.

Jæja, segjum það gott í bili...erum að dunda við að setja inn myndir.
Njótið sumarsins!

Nýjar myndir...

...vorum að dunda við að setja inn myndir frá mars og apríl.

Annars er allt gott að frétta úr Skaftahlíðinni, tjaa fyrir utan hlaupabólu og streptókokka (já enn og aftur) hja Hauknum. Elvar Orri var að koma af fótboltamóti og hann er svo ánægður í fótboltanum, finnst æði að fara á svona mót. Þetta mót var haldið í Egilshöllinni og gekk svona la-la ;) ...allt að koma hjá völsurunum ungu. Næsta mót verður í lok maí í Laugardalnum og svo förum við auðvitað á skagamótið í júní...já það er nóg að gera í boltanum hjá okkur og anti-sportista foreldrarnir eru bara að fíla þetta stúss ;)



Framundan er falleg helgi, sem við værum nú til í að geta nýtt betur öll saman, en við reynum nú að hafa bara vaktaskipti....það þarf jú einhver að vera heima með litla bólu-hjálmarinn. Mútta og Elvar Orri eru að gæla við að skella sér niður í bæ og sjá Garðabrúðu á útitaflinu í Lækjargötu...gæti verið gaman.

Góða helgi!